Настапот на Карлос Алкарас на претстојниот УС Опен и натаму е неизвесен, а долгата пауза од натпреварувачки тенис може да му создаде сериозни проблеми при враќањето на теренот. За разлика од него, италијанскиот лекар Џани Даниеле смета дека Јаник Синер најверојатно ќе биде подготвен за последниот гренд слем во сезоната.
Алкарас веќе четири месеци нема одиграно официјален натпревар, додека Синер последен пат настапи на Вимблдон. Двајцата најдобри тенисери во светот во моментов немаат потврдено дали ќе настапат во Њујорк.
Сепак, според Даниеле, кој е претседател на лекарската комисија на Италијанската тениска федерација, ситуацијата кај Синер не треба да се драматизира. Италијанецот неодамна ги откажа настапите во Монтреал и Синсинати поради проблеми со коленото.
„Мислам дека не треба да се претерува со проблемот на Синер и дека тој ќе биде подготвен за УС Опен“, изјави Даниеле за „Република“.
Според него, проблемот со коленото кај Синер може да е последица на пребрзото враќање на интензивни тренинзи по освојувањето на Вимблдон.
„По победата во Лондон добро се одмори, а потоа започна премногу интензивно да тренира на тврда подлога и коленото реагираше“, објасни тој.
Многу поголема загриженост Даниеле изрази за Алкарас, кој поради долгото отсуство би можел да се соочи не само со физички, туку и со психолошки предизвици.
„Мислам дека сега би можел да има психолошки проблеми“, вели италијанскиот лекар, посочувајќи дека по долга пауза не е лесно повторно да се тренира со максимален интензитет.
Според него, кај шпанскиот тенисер може да постои и страв од повторна повреда, што дополнително би го отежнало враќањето во натпреварувачки ритам. Даниеле дури смета дека кај Алкарас можеби се појавила и „форма на депресија“.
Дополнителен проблем е што евентуалното враќање на Алкарас би било токму на гренд слем турнир. На УС Опен натпреварите се играат во три добиени сета, што значи дека уште од првото коло може да биде принуден на долги и физички исклучително напорни мечеви.
Алкарас минатата година триумфираше на УС Опен, откако во финалето го совлада Синер. Овојпат, сепак, двајцата би можеле да пристигнат во Њујорк со значително поинаква физичка и натпреварувачка подготовка.
