Делегација на Левица, предводена од потпретседателот на партијата и пратеник Реџеп Исмаил, денеска по повод Илинден положи свежо цвеќе пред Меморијалниот центар на АСНОМ во Пелинце.
Во делегацијата беа и членовите на Централниот комитет на Левица, Дејан Димовски и Виторио Зафировски.
Од Левица соопштија дека АСНОМ претставува најголемата обврска преземена пред идните поколенија, оценувајќи дека асномците не се бореле само за својата генерација, туку и за иднината на Македонија.
„Секоја генерација има свое историско прашање – дали ја оставила државата посилна отколку што ја наследила?“, наведуваат од партијата.
Во соопштението Левица оценува дека во изминатите три децении македонската политика повеќе ја исцрпувала државата отколку што ја градела, при што, според нив, суверенитетот се намалувал, а достоинството станало предмет на дневни политички преговори.
Од партијата додаваат дека споменот на двата Илиндена останува жив кај македонскиот народ и претставува водечки идеал врз кој, како што наведуваат, ќе се зачува и заштити Републиката.
