Левица: „Фон дер Лајен го деблокира процесот, а Мицкоски кима со главата“

Левица реагираше на посетата на претседателката на Европската комисија, Урсула фон дер Лајен, на Македонија и на разговорите со премиерот Христијан Мицкоски, оценувајќи дека најавеното обновување на дијалогот со Бугарија отвора прашање за можни уставни измени.

Од партијата велат дека граѓаните биле сведоци на, како што оценуваат, „уште една повреда на елементарното достоинство“ за време на посетата на Фон дер Лајен. Левица особено ја критикува нејзината пофалба за улогата на Македонија во склучувањето на Преспанскиот договор и учеството во коалицијата за помош на Украина.

— реклама —

Од Левица потсетуваат и на протестот на Мицкоски од 14 јули 2022 година, кога тој протестираше пред Собранието за време на обраќањето на Фон дер Лајен во врска со францускиот предлог.

„Мицкоски, кој власта ја освои со ветување за враќање на уставното име, сега најавува билатерални состаноци со бугарската страна со цел ‘деблокада на процесот на евроинтеграции’“, наведуваат од партијата.

— реклама —

Левица оценува дека најавените состаноци би можеле да се однесуваат на уставни измени и внесување на Бугарите во Уставот.

Од партијата додаваат дека Владата, предводена од ВМРО-ДПМНЕ, не реагирала, како што тврдат, на начинот на кој Молдавија и Украина се позиционирани во процесот на проширување на Европската Унија, додека истовремено се зборува за достоинство, заемно почитување и фер третман.

— реклама —

Левица најавува дека ќе се спротивстави на евентуални уставни измени.

„Насетувајќи ја намерата на Мицкоски, најавуваме дека со сите расположливи механизми ќе се бориме против овој акт на велепредавство во режија на лажните патриоти од ДПМНЕ“, се наведува во реакцијата.

Од партијата сметаат дека внесувањето на Бугарите во Уставот нема да гарантира членство во Европската Унија и велат дека Македонија треба да добие почит и рамноправност, а не, како што наведуваат, „уцени спакувани во дипломатски пофалби“.

Левица порача дека ќе се спротивстави на секое, како што го нарекува, „пазарење“ и дека ќе го брани ставот оти за иднината на Македонија треба да одлучуваат граѓаните.