Левица: Коцкарниците на народот му ја земаат платата, брзите кредити иднината - 1,6 милијарди евра завршиле во коцкарската индустрија заштитена од ДПМНЕ

Левица преку соопштение реагира дека коцкарската индустрија во Македонија продолжува да расте, повикувајќи се на податоци од Управата за јавни приходи. Од партијата тврдат дека само во првите шест месеци од годинава граѓани на Македонија и странски државјани потрошиле речиси 1,6 милијарди евра во казина, автомат-клубови и обложувалници.

Од Левица велат дека со години предупредуваат оти зад игрите на среќа стои индустрија која, според нив, профитира од економските тешкотии на граѓаните.

— реклама —

Партијата наведува дека во Собранието барала укинување на казината, обложувалниците и автомат-клубовите, ограничување на онлајн коцкањето и забрана на агресивното рекламирање на игрите на среќа. Според Левица, досегашните мерки не го решиле проблемот, туку само довеле до преместување на дел од објектите.

— реклама —

Од партијата посочуваат дека последиците од коцкањето, според нив, се поврзани и со задолжувањето преку брзи кредити. Откако ќе се потрошат платата и заштедите, велат од Левица, граѓаните може да посегнат по кредити, а потоа да земаат нови за да ги покријат претходните обврски.

Левица потсетува дека отвори иницијатива и против, како што ги нарекува, злоупотребите поврзани со брзите кредити и ги повика граѓаните да ги пријавуваат неправилностите во работењето на финансиските друштва.

— реклама —

„Не можеме да зборуваме за коцкарската индустрија, а да го игнорираме системот на лихварство што стои веднаш до неа“, наведуваат од партијата.

— реклама —

Од Левица оценуваат дека дел од приходите на граѓаните наместо за секојдневни потреби, храна, домување и образование, завршуваат во казина, автомат-клубови и обложувалници, по што дел од граѓаните дополнително се задолжуваат.

Партијата повторно побара целосна забрана на коцкањето и ограничување на рекламирањето на игрите на среќа, обвинувајќи ја власта дека ја штити коцкарската индустрија.