Премиерот Христијан Мицкоски најави детална анализа на цените на прехранбените производи, посочувајќи дека лично е вклучен во процесот на идентификување на производите што влијаат врз потрошувачката кошница.
Одговарајќи на новинарско прашање дали може да се очекува намалување на цените на храната, Мицкоски рече дека Владата темелно навлегува во проблематиката и работи на нова методологија за следење на цените.
„Лично јас се занимавам со идентификување на тие 600 производи што влегуваат во статистиката и тоа за мене е врвен приоритет“, изјави премиерот.
Тој се повика на последните податоци на Евростат, според кои основната потрошувачка кошница во Македонија е најевтина во Европа и изнесува околу 49,7 проценти од европскиот просек.
„Дали е тоа доволно? Не е доволно. Треба да продолжиме да работиме и ќе работиме. Работам на методологија за идентификување на тие 600 до 700 производи што статистички се мерат и директно на нив ќе одиме. Ако треба, фактура по фактура ќе ги анализираме“, рече Мицкоски.
Според него, секој производ ќе биде поединечно анализиран со цел да се утврди каде постои простор за интервенција и подобрување на состојбата.
„Ова е темелна операција што лично ја водам и очекувам многу скоро да даде резултати кои ќе бидат видливи на терен“, истакна премиерот.
