Лукаревска: Како ќе се реши проблемот на Детска клиника, во ризик е здравјето на децата

Пратеничката од СДСМ, Сања Лукаревска, на денешната собраниска седница постави пратеничко прашање до заменик-министерот за здравство, Јовица Андовски, во кое побара одговор како Министерството ќе го реши проблемот со околу 50 вработени на Клиниката за детски болести кои, како што рече, веќе шест месеци не земаат плата.

Лукаревска оцени дека здравствениот систем се соочува со сериозни проблеми, посочувајќи на недостиг на медицински кадар, незадоволство кај пациентите и вработените, несоодветни услови во здравствените установи, како и бројни скандали кои, според неа, дополнително го нарушуваат функционирањето на здравството.

— реклама —

„Имаме проблеми, застој и незадоволство на секој чекор. Недостига медицински кадар, има несоодветни услови во клиниките, револтирани пациенти кои се во животозагрозувачка состојба поради несоодветен третман, како и бројни судски спорови за неисплатени дежурства и прекувремена работа“, истакна Лукаревска.

Таа се осврна и на состојбата на Клиниката за детски болести, нагласувајќи дека вработените неодамна протестирале пред Министерството за здравство поради тоа што не примиле плата во изминатите шест месеци.

— реклама —

„Нивниот статус сè уште останува нерешен. Најголемиот проблем е што е загрозен животот на децата на кои им е потребна редовна контрола, терапија и соодветна грижа. На овие деца не им помагаат прес-конференции ниту префрлање на одговорноста од една на друга институција“, рече Лукаревска.

— реклама —

Пратеничката побара одговор кој ќе понесе одговорност за ваквата состојба и како Министерството планира да го надмине проблемот.

Таа додаде дека, и покрај заложбите наведени во владината програма за ефикасен и достапен здравствен систем, реалната состојба, според неа, покажува поинаква слика.

Лукаревска се повика и на најновиот Индекс за здравствена заштита на „Намбео“ за 2026 година, според кој Македонија е рангирана меѓу земјите со најлошо оценети здравствени системи, особено во делот на квалитетот на здравствените услуги, инфраструктурата и времето на чекање за лекување.

На крајот, таа побара конкретен одговор од Министерството за здравство за тоа кога и на кој начин ќе биде решен проблемот на Клиниката за детски болести.