Лукаревска: Реконструкцијата е само рокадa на министри, проблемите на граѓаните нема да се решат

Пратеничката на СДСМ, Сања Лукаревска, на денешната собраниска седница оцени дека реконструкцијата на Владата нема да ги реши клучните проблеми со кои се соочуваат граѓаните, ниту ќе ги промени политиките што, според неа, не дале резултати во изминатите две години.

Таа истакна дека државата се соочува со бројни предизвици – од економијата и животниот стандард, преку реформите во правосудството и енергетската сигурност, до задржувањето на младите, ценовните шокови, насилството и деблокирањето на евроинтегративниот процес.

— реклама —

„Прашањето е дали сите овие предизвици можат да се решат со кадровска реформа или се потребни суштински потези за подобрување на функционалноста, политичката стабилност и спроведувањето на реформите“, рече Лукаревска.

Таа нагласи дека секоја реконструкција треба да испрати порака дека власта е подготвена да интервенира таму каде што нема резултати, но изрази сомнеж дали предложените кадровски решенија ќе успеат да одговорат на обврските што ги очекуваат.

— реклама —

Според неа, ВМРО-ДПМНЕ со реконструкцијата ги зајакнува своите позиции во Владата преку преземање нови ресори, додека коалициските партнери добиваат нови министерства без гаранција дека тоа ќе донесе подобри политики.

Лукаревска се осврна и на кадровските решенија во повеќе ресори, критикувајќи го изборот на новиот министер за земјоделство, за кого рече дека нема соодветно искуство во областа, како и состојбите во Министерството за локална самоуправа, култура и економија.

Таа оцени дека министерот за економија не успеал да се справи со ценовните шокови и не ги искористил законските механизми за заштита на потрошувачите.

— реклама —

Во обраќањето Лукаревска посочи и дека е разочарана што со реконструкцијата не е подобрена родовата застапеност во Владата.

„Очекував дека со новите кадровски решенија ќе има повеќе жени на министерски функции, бидејќи сметам дека тие се неопходни за подобри резултати и поквалитетно управување“, рече таа.

— реклама —

На крајот порача дека не е важно која политичка партија добива или губи со реконструкцијата, туку единствениот критериум треба да биде дали граѓаните ќе почувствуваат подобрување.

„Најголема корист од оваа реконструкција треба да имаат граѓаните. Тие треба да бидат вистинските победници“, истакна Лукаревска.