СДСМ преку соопштение обвини дека враќањето на Сотир Лукровски на функцијата градоначалник на Општина Карпош не е негова лична одлука, туку резултат на притисок од раководството на ВМРО-ДПМНЕ.
Од партијата наведуваат дека Лукровски, кој по речиси два месеца отсуство повторно ја презеде функцијата, претходно имал намера да поднесе оставка, но, како што тврдат, тоа не му било дозволено.
Според СДСМ, ВМРО-ДПМНЕ не сакала да ризикува предвремени локални избори во Карпош, поради што, како што велат, Лукровски бил принуден да остане на функцијата.
„Ова е уште еден доказ за начинот на кој функционира системот на Мицкоски. Луѓето се поставуваат на функции за да ги штитат партиските интереси, а не интересите на граѓаните. Кога некој ќе се обиде да се повлече, му се врши притисок да остане“, наведуваат од СДСМ.
Оттаму оценуваат дека Лукровски прифатил да остане градоначалник и да ја преземе одговорноста за политиките на премиерот Христијан Мицкоски и ВМРО-ДПМНЕ.
Во соопштението, СДСМ прашува колку други градоначалници и министри се на функции против своја волја, само за, како што велат, владејачката партија да ја задржи контролата врз институциите.
Од партијата додаваат дека граѓаните на Карпош заслужуваат функционална локална власт која ќе работи во нивен интерес, а не, како што тврдат, според партиски директиви.
