Ново пукање во ресторан во Белград се случило вчера, во серијата инциденти за кои се сомнева дека се поврзани со мафијашки пресметки. Во нападот едно лице било рането, а осомничениот напаѓач е уапсен.
Инцидентот се случил само неколку часа откако непознати лица запалиле неколку угостителски објекти во населбата Врачар.
Според соговорници на N1, мафијашките конфронтации во Белград никогаш не престанале, но јавноста по убиството во Сењак почнала повеќе да обрнува внимание на нив.
Во ресторанот „Џери“ на Нов Белград било рането лице кое седело во локалот. Повредениот бил пренесен во Ургентниот центар и, според информациите, е надвор од животна опасност.
Набрзо бил уапсен млад маж за кого се сомнева дека е сторителот. Неофицијално, против него ќе се води постапка за тешко убиство во обид и нелегално поседување оружје, додека обвинителството работи и на откривање на можните нарачатели.
Пиштолот со кој било извршено пукањето бил пронајден во близина на ресторанот.
Новинарот Вук Цвијиќ оцени дека ситуацијата е сериозна и предупреди на можна поврзаност меѓу организираниот криминал и луѓе блиски до власта.
„Ситуацијата не беше ваква ниту во деведесеттите години“, изјави Цвијиќ.
Ресторанот „Џери“ бил нападнат и во февруари годинава, кога пред објектот била фрлена експлозивна направа, но тогаш немало повредени.
Ноќта пред пукањето, непознати лица фрлале молотови коктели врз неколку барови во Врачар, при што избувнале пожари кои биле брзо локализирани. Дел од српските медиуми објавија дека еден од опожарените локали бил во сопственост на Вук Бајрушевиќ, кој беше убиен во декември минатата година.
Од Министерството за внатрешни работи на Србија засега нема официјален одговор за можната поврзаност на инцидентите.
