Маѓар: Илјадници пријави за изборни нерегуларности, ќе следуваат тужби

Лидерот на опозициското движење Тиса, Петер Маѓар, во обраќање до јавноста порача дека денешниот ден во Унгарија претставува „празник на демократијата“, истакнувајќи ја рекордната излезност на гласачите.

Тој им се заблагодари на сите граѓани што го искористиле своето право на глас, нагласувајќи дека ваква излезност не е забележана од 1990 година.

— реклама —

„Луѓето ја почувствуваа важноста на изборите“, рече Маѓар, додавајќи дека благодарност заслужуваат сите, без оглед за кого гласале.

— реклама —

Осврнувајќи се на анкетите, Маѓар потенцираше дека целта на неговата партија не е победа во истражувањата на јавното мислење, туку на изборите. Тој изрази оптимизам за исходот, но нагласи дека станува збор за „внимателен оптимизам“.

Маѓар информираше дека Тиса примила илјадници пријави за наводни изборни нерегуларности, од помали до посериозни случаи, најавувајќи дека ќе бидат преземени сите правни чекори.

— реклама —

„Секој што сторил изборна измама ќе одговара пред законот“, порача тој.

Во своето обраќање, тој им се заблагодари и на повеќе од 50.000 волонтери и набљудувачи, оценувајќи дека нивното присуство е неопходно поради, како што рече, нефункционалноста на системот.

На крајот, Маѓар ги повика поддржувачите да останат мирни и достоинствени, демантирајќи информации дека партијата подготвува какви било активности по објавувањето на резултатите.