Унгарскиот премиер Петер Маѓар соопшти дека со претседателката на Европскиот парламент, Роберта Мецола, разговарал за можноста Европската Унија да ја затвори постапката по членот 7 против Унгарија, која беше покрената пред осум години поради загриженост за владеењето на правото и демократијата.
По средбата во Брисел, Маѓар на социјалните мрежи напиша дека постои согласност процесот да биде завршен до есен.
„Се согласивме дека постапката по членот 7, покрената пред осум години, треба да биде затворена до есен“, наведе унгарскиот премиер.
Сепак, од кабинетот на Мецола излегоа со повнимателен став, истакнувајќи дека евентуалното затворање на постапката ќе зависи од тоа дали Европскиот парламент ќе констатира конкретен и видлив напредок во решавањето на претходно нотираните проблеми.
Постапката по членот 7 беше активирана во 2018 година и претставува најстрог механизам на ЕУ за санкционирање на земјите-членки кои ги нарушуваат основните вредности на Унијата. Теоретски, таа може да доведе и до суспензија на правото на глас на земјата-членка во институциите на ЕУ.
Маѓар, кој ја презеде функцијата премиер во април, бара процесот да биде прекинат и најавува реформи со кои Унгарија би можела да добие пристап до повеќе од 16 милијарди евра европски средства што моментално се замрзнати.
И покрај поддршката од дел од европратениците, во Европскиот парламент сè уште постојат резерви. Неколку влијателни пратеници сметаат дека постапката треба да остане активна сè додека не бидат отстранети сите забелешки поврзани со владеењето на правото и функционирањето на демократските институции во земјата.
Конечната проценка за напредокот на Унгарија се очекува по мониторинг-мисијата на Европскиот парламент најавена за октомври.
