Премиерот Христијан Мицкоски изјави дека Македонија во моментов има убедливо најниски цени на дизелот и бензинот во регионот, оценувајќи дека владините мерки успешно ги амортизирале последиците од енергетската криза.
Говорејќи на денешната седница за пратенички прашања во Собранието, Мицкоски истакна дека Владата во изминатиот период не создавала паника, туку работела граѓаните што помалку да ги почувствуваат последиците од кризата.
„Резултатот е дека денеска имаме убедливо најниски цени на горивата, не само во текот на кризата, туку и во споредба со земјите од регионот“, рече премиерот.
Тој направи споредба со цените во соседните држави, посочувајќи дека во Македонија дизелот чини 1,31 евро за литар, а безоловниот бензин 1,36 евра, додека во останатите земји од регионот цените се значително повисоки.
Според него, разликата во однос на соседните земји се движи од 20 до 50 евроценти по литар.
Мицкоски нагласи дека Владата успеала да ги надомести намалените приходи од ДДВ и акцизите преку зголемена продажба на горива.
„Имавме претприемачка логика. Изгубените приходи од намалените даноци ги амортизиравме со поголем обем на продажба. Имаше денови кога потрошувачката на горива беше зголемена и до 50 проценти, а голем број граѓани од Србија, Албанија и Грција доаѓаа да точат гориво во Македонија“, истакна тој.
Одговарајќи на прашањето дали Владата планира нови мерки, премиерот рече дека во овој момент не се предвидуваат дополнителни интервенции, бидејќи трендот на намалување на цените продолжува.
„Доколку продолжи сегашниот тренд, очекуваме веќе од понеделник уште едно, уште поголемо намалување на цените на бензините и дизелот, со што постепено ќе се вратиме на нивото од крајот на февруари оваа година“, порача Мицкоски.
