Македонија денеска ќе го направи еден од најзначајните чекори во областа на дигиталниот развој со официјалното претставување на „Везилка“ – Националната фабрика за вештачка интелигенција, чија цел е да го поттикне технолошкиот напредок и да ја вклучи земјата во европските иницијативи за развој на вештачката интелигенција.
Проектот е координиран од Факултетот за компјутерски науки и инженерство (ФИНКИ) при Универзитетот „Св. Кирил и Методиј“ во Скопје, во соработка со Министерството за дигитална трансформација.
„Везилка“ е воспоставена во рамките на Европската заедница за пресметување со високи перформанси (EuroHPC JU), а проектот е кофинансиран од Европската Унија преку програмата „Хоризонт Европа“.
Преку соработката со грчката фабрика за вештачка интелигенција „Фарос“, Македонија ќе стане дел од европските напори за развој на доверлива, иновативна и етичка вештачка интелигенција, насочена кон потребите на граѓаните.
Еден од најважните сегменти на проектот е создавањето збирки на податоци и дигитални ресурси на македонски јазик, што ќе овозможи поголема застапеност на македонскиот јазик и локалните специфики во идните системи базирани на вештачка интелигенција.
Од ФИНКИ посочуваат дека „Везилка“ ќе придонесе за зајакнување на дигиталниот суверенитет на државата, ќе ја забрза дигиталната трансформација на јавниот сектор и ќе отвори нови можности за научноистражувачка работа, претприемништво и развој на иновативни технологии.
