„Македонија е меѓу земјите со највисок економски раст во Европа“, рече Мицкоски

Премиерот Христијан Мицкоски оцени дека македонската економија бележи силен раст, посочувајќи дека БДП во второто тримесечје од 2026 година пораснал за 4,3 отсто, додека растот во првото полугодие изнесува околу 3,7 отсто.

Одговарајќи на новинарско прашање, Мицкоски рече дека економската активност е исклучително висока и дека резултатите од политиките на Владата почнуваат да се гледаат.

„Во второто тримесечје имаме исклучително висока економска активност и зголемен бруто-домашен производ од 4,3 проценти“, рече Мицкоски.

— реклама —

Тој оцени дека овие резултати претставуваат „лоша вест за опозицијата“, која, според него, очекува Македонија да биде вовлечена во политички поделби наместо да напредува.

Мицкоски призна дека не се решени сите проблеми, но посочи дека Владата работи на надминување на наследените проблеми и, како што рече, на тоа да не создава нови.

Премиерот посочи и на растот на индустриското производство и стабилизираната инфлација. Според него, со растот од 3,1 отсто во првото тримесечје и 4,3 отсто во второто, просечниот раст во првото полугодие достигнува околу 3,7 отсто.

— реклама —

„Ова е еден од најсилните растови во Европа“, оцени Мицкоски, додавајќи дека Македонија се наоѓа меѓу земјите со највисок раст на БДП во второто тримесечје и во првата половина од годината.

Тој направи споредба со Словенија, која во второто тримесечје од 2026 година има раст од 4,8 отсто, но во истиот период во 2025 година имала раст од 0,7 отсто. Според Мицкоски, пред Македонија се уште Малта и Данска.

— реклама —

„Не можат фактите да ги негираат. Ние ќе продолжиме и понатаму да работиме“, порача премиерот, повторно критикувајќи ги неговите политички противници и нивните реакции на социјалните мрежи.

Мицкоски се осврна и на претходните години, посочувајќи дека 2024 година била завршена со раст на БДП од три отсто, 2025 година со 3,5 отсто, а во првото полугодие од 2026 година растот достигнал околу 3,7 отсто.

Според него, ваквите резултати се особено значајни ако се земе предвид економскиот раст во Европската Унија и еврозоната, кои, како што посочи, во истиот период бележат раст од 1,2, односно еден отсто.

— реклама —

„Имаме еден континуиран раст, во услови кога нашиот најголем трговски партнер, а тоа е Европската Унија и земјите од еврозоната, имаат многу пониски стапки на раст“, рече Мицкоски.

Тој оцени дека споредбата со периодот од 2006 до 2008 година, кога Македонија имала раст од пет до шест отсто, треба да се прави со оглед на тогашниот раст на економиите во ЕУ и еврозоната.

„Тоа само по себе говори за политиките на оваа Влада“, заклучи Мицкоски.