Премиерот Христијан Мицкоски во интервју за „Брајтбарт њуз“ порача дека Македонија е меѓу најсилните поддржувачи на американскиот претседател Доналд Трамп во Европа, при што најави продлабочување на соработката со Вашингтон во повеќе области.
Мицкоски посочи дека Владата воспоставила контакти со луѓе од тимот на Трамп уште за време на неговата изборна кампања во 2024 година. Според него, Македонија била меѓу првите европски земји што воспоставиле директна комуникација со негови соработници.
Тој потсети дека по самитот на НАТО во Вашингтон во јули 2024 година, во Владата пристигнала делегација составена од соработници на Трамп, меѓу кои и секретарот за трговија Хауард Лутник, поранешниот конгресмен Девин Нунес и Крис Павловски, сопственикот на „Рамбл“.
По победата на Трамп на изборите, Мицкоски присуствувал и на неговата инаугурација, а македонска владина делегација престојувала во Вашингтон.
„Поддршката на претседателот Доналд Трамп во Македонија е многу висока, повисока од каде било во Европа“, изјави Мицкоски, додавајќи дека би сакал да го пречека американскиот претседател во Македонија доколку неговиот распоред му дозволи посета на регионот.
Премиерот нагласи дека Македонија во повеќе наврати ги поддржувала американските позиции во Обединетите нации, вклучително и за прашања поврзани со Иран, Венецуела и Куба.
Според Мицкоски, Македонија не се воздржувала од поддршка на САД ниту во ситуации кога таквиот став можел да има политичка цена.
„Кога на Америка ѝ беа потребни сојузници за практично да заземат ставови, мојата земја не се криеше во толпата“, рече тој.
Во интервјуто посебно ја истакна соработката со американскиот претставник Ричард Гренел и со американската амбасадорка во Грција, Кимберли Гилфојл, особено во областа на енергетиката. Мицкоски оцени дека Македонија има потенцијал да биде важна точка за американските енергетски интереси на Балканот, вклучително и за можен извоз на течен природен гас во регионот.
Економската соработка со САД, според премиерот, е уште еден сегмент во кој се очекува напредок. Тој рече дека Македонија била меѓу првите земји што започнале разговори со администрацијата на Трамп по воведувањето на американските царини.
Мицкоски тврди дека во разговорите е постигната основа за билатерален договор со кој македонските производи би се извезувале во САД со нулта царинска стапка, додека истовремено нулта стапка би се применувала и за одредени американски производи.
Премиерот очекува договорот официјално да биде потпишан за време на Генералното собрание на ОН во Њујорк, оценувајќи дека тоа би отворило дополнителни можности за американски инвестиции и извоз во Македонија и регионот.
Мицкоски најави дека за време на претстојната посета на САД очекува да бидат разгледани и други можности за соработка, а изрази надеж и за средба со Трамп.
Тој порача дека целта на Владата е стратешкиот дијалог со Вашингтон да се претвори во конкретни проекти во безбедноста, енергетиката, инфраструктурата, трговијата и инвестициите.
