Иако судиите деновиве алармираат за високи оптоварувања и недоволни ресурси, официјалните европски податоци покажуваат дека Македонија има релативно голем број судии во споредба со другите држави.
Според најновиот извештај на ЦЕПЕЈ (Европската комисија за ефикасност на правосудството), нашата земја располага со околу 22,3 судии на 100.000 жители, бројка која е над европскиот просек од околу 21,9–22,2.
Тоа значи дека Македонија не е меѓу земјите со недостиг од судии – напротив, е во групата со повисока густина на судски кадар.
Дополнително, податоците покажуваат дека Македонија има двојно повеќе судии по жител отколку низа земји од Европската Унија, меѓу кои:
Данска – 6,5
Ирска – 3,3
Шведска – 11,7
Франција – 11,3
Шпанија – 11,9
Исланд – 16,5
Норвешка – 10,5
Малта – 9,0
Дури и последните пресметки, според кои земјава има 363 активни судии (просек 19,9 судии на 100.000 жители), ја поставуваат Македонија значително над многу европски и светски системи.
Во глобален контекст, просекот е 10,6 судии на 100.000 жители – што уште повеќе ја истакнува разликата.
Повеќе пари и повеќе судии – но без повисока ефикасност
Иако бројот на судии е висок, а судството добива стабилен дел од буџетот (0,39 отсто од БДП – повеќе од европскиот просек), ефикасноста на системот останува проблем.
Трошоците за плати значително пораснале последниве години, а судиите во Македонија земаат и до 2,7 пати повеќе од просечната плата во државата.
Сево ова укажува дека главниот предизвик не е ниту во бројноста ниту во финансиите, туку во организацијата, управувањето со предметите и внатрешната функционалност на судството.
