Македонија отвора врата за технолошки гиганти: се планираат инвестиции во дата-центри

Македонија планира да привлече странски технолошки компании и инвестиции во изградба на центри за податоци, а до 2029 година да привлече најмалку две стратешки значајни компании од областа на вештачката интелигенција. Плановите се содржани во нацрт-стратегијата за употреба на вештачката интелигенција, објавена на Единствениот национален регистар на прописи.

— реклама —

Една од предвидените активности е изработка на студија за можностите за привлекување инвестиции во центри за податоци, која треба да се реализира во текот на 2027 година. Овие објекти се важен дел од дигиталната инфраструктура, бидејќи овозможуваат складирање и обработка на големи количества податоци, функционирање на услугите во облак и развој на системи со вештачка интелигенција.

Во нацрт-стратегијата засега не се посочени конкретни локации за изградба ниту имиња на потенцијални инвеститори или компании со кои се водат преговори. Предвидена е студија за привлекување инвестиции, а не конкретен проект за изградба на центар за податоци.

— реклама —

Планот предвидува и привлекување најмалку две таканаречени „anchor“ компании од секторот на вештачката интелигенција до 2029 година. Нивното присуство би требало да придонесе за нови инвестиции, отворање работни места, ангажирање домашни инженери и соработка со македонските компании. Сепак, во документот не се наведува кои компании се цел на овие активности ниту се прецизира дека тие мора да инвестираат во центри за податоци.

— реклама —

Покрај развојот на инфраструктурата, стратегијата предвидува и подготовка на законска рамка за употребата на вештачката интелигенција, усогласена со европските правила. Со неа треба да се уредат безбедната, одговорната и етичката примена на технологијата, како и прашањата за заштита на личните податоци, транспарентноста и одговорноста при користењето автоматизирани системи.

Предвидена е и поддршка за малите и средните претпријатија во Македонија за примена на вештачката интелигенција преку дигитална трансформација, советодавни услуги и поврзување со експерти.

Стратегијата опфаќа активности за периодот од 2027 до 2029 година, со стратешки хоризонт до 2032 година.