СДСМ преку соопштение соопшти дека најновите податоци на Евростат покажуваат оти Македонија има најнизок животен стандард и најслаба куповна моќ во Европа.
Според партијата, индексот на просечната потрошувачка во земјава изнесува 49,7, додека просекот во Европската Унија е 100, што, како што наведуваат, ја позиционира Македонија на последното место во Европа.
Од СДСМ посочуваат дека пред Македонија се наоѓаат Турција, Босна и Херцеговина, Романија, Бугарија, Црна Гора и Србија.
Во реакцијата се наведува дека, и покрај изјавите на премиерот Христијан Мицкоски за економски раст, развој на туризмот и позитивни економски показатели, официјалните податоци на Евростат покажуваат поинаква слика.
„Ниските цени не се успех, туку показател за сиромаштија и ниска куповна моќ“, велат од СДСМ, додавајќи дека реалноста со која се соочуваат граѓаните е значително полоша од владините оценки за економската состојба.
