Македонија со подобра оценка од Европската комисија за дигиталната трансформација

Дигиталната трансформација во Македонија бележи значителен напредок, покажува најновиот извештај на Европската комисија за 2026 година, во кој состојбата во оваа област за првпат е оценета како „добра“.

— реклама —

Министерот за дигитална трансформација Стефан Андоновски посочува дека подобрувањето се однесува на поглавјето 10, кое ги опфаќа дигиталната трансформација и медиумите.

Според оценките на Европската комисија, во периодот од 2021 до 2024 година Македонија бележела ограничен напредок, додека во 2025 година биле забележани првите позитивни промени. Во извештајот за 2026 година за првпат е нотирано добро ниво на напредок.

— реклама —

За подобрата оценка придонеле проширувањето на електронските услуги и двојното зголемување на нивното користење од страна на граѓаните. Напредок е постигнат и во размената на информации меѓу државните институции, како и во активностите за зајакнување на заштитата од сајберзакани.

— реклама —

Андоновски ги издвојува и усвоените закони и стратегии, подготвени во согласност со европските стандарди, кои треба да послужат како основа за натамошно унапредување на дигиталните процеси.

„Целта на дигиталната трансформација е придобивките да ги почувствуваат граѓаните и компаниите во секојдневното функционирање – со помалку чекање, помалку документација и побрзо добивање услуги“, истакнува министерот.

— реклама —

Тој оценува дека извештајот од Брисел е потврда за досега постигнатото, но и поттик за продолжување на реформите. Во наредниот период предизвик ќе биде резултатите да се преточат во подостапни, побрзи и поефикасни услуги за граѓаните и деловниот сектор.