Македонија со сè помалку деца: Источниот регион со најниска стапка на фертилитет, Скопје на врвот

Стапката на фертилитет во Македонија е речиси на исто ниво со просекот во Европската Унија, но меѓу домашните региони постојат значителни разлики. Најмногу живородени деца по жена се регистрирани во Скопскиот регион, додека Источниот регион има најниска стапка во земјава.

— реклама —

Податоците на Евростат покажуваат дека во Македонија стапката изнесува 1,35 живородени деца по жена. Во Европската Унија, пак, во 2024 година таа се намалила на 1,34, што е најниско забележано ниво досега.

Во последните две децении, фертилитетот во ЕУ постојано бил под 2,10 деца по жена – нивото што се смета за потребно за природно обновување на населението во услови на ниска смртност.

— реклама —

Според регионалните показатели во Македонија, Скопскиот регион е на прво место со 1,73 живородени деца по жена. Над државниот просек се и Североисточниот регион, каде што стапката изнесува 1,40, и Пелагонискиот регион со 1,36.

— реклама —

Најнеповолни показатели има Источниот регион, со 1,16 живородени деца по жена. Во Полошкиот и Југозападниот регион стапката е 1,27, во Југоисточниот изнесува 1,30, а во Вардарскиот регион достигнува 1,31.

Разлики се забележуваат и во рамките на Европската Унија. Од 1.165 региони за кои има достапни податоци, во 439, односно 37,7 проценти, стапката била под европскиот просек. Во 714 региони, или 61,3 проценти, била повисока, додека во 12 региони се изедначила со просекот на Унијата.

Меѓу регионите со најниски стапки на фертилитет во Европа се делови од Шпанија и Италија. Помалку од едно живородено дете по жена е регистрирано во 16 региони во Шпанија, седум во Полска, пет во Италија, три во Грција и по два во Германија и Литванија.