„Имаме количини и за соседите“: Мицкоски вели дека Македонија е енергетски стабилна, а нормализација е можна дури напролет

Македонија во моментов има доволно залихи на енергенси и не се соочува со проблем во снабдувањето, но состојбата во Европа во претстојниот период може да биде предизвик. Премиерот Христијан Мицкоски вели дека Владата има план за справување со можните последици од енергетските нарушувања и дека земјава е во „исклучително добра и солидна“ енергетска состојба.

Мицкоски беше прашан дали растот на цената на природниот гас и состојбата со европските резерви може да се одразат врз греењето во Скопје и врз стопанството.

— реклама —

„Ние имаме план, знаеме како сето тоа ќе го реализираме и се реализира. Не сме голем потрошувач на гас како држава, што е олеснителна околност, но ќе биде предизвик“, рече Мицкоски.

— реклама —

Тој посочи дека дури и доколку војната во Заливот престане, ќе биде потребен период за да се нормализираат испораките на енергенси и количините да стигнат до крајните потрошувачи

„Утре да престане војната во Заливот, а нема, од тоа што го слушаме, и тоа би можело да биде во декември, да се нормализира испораката на гас и нафта во Заливот, ќе требаат 40 дена тие количини да стигнат до потрошувачите. Нормализација таму ќе има на пролет“, рече премиерот.

— реклама —

Како дополнителен ризик го посочи евентуалното реализирање на забраната за извоз поврзана со Венецуела и САД, оценувајќи дека тоа би претставувало „сериозен предизвик“.

Мицкоски вели дека разговарал и со поголемите нафтени компании во земјава и дека во моментов има залихи.

„Добро е што имаме залихи, што имаме количини во продуктоводот. Тој функционира, работи. Има количини и за соседите. Од денешна перспектива ние немаме таков предизвик. Но, да, во Европа ќе има. Ќе видиме како ќе се случуваат работите. Енергетски сме во исклучително добра и солидна состојба“, рече Мицкоски.