Премиерот Христијан Мицкоски на денешната прес-конференција порача дека македонската Армија добива признание и поддршка од Европската Унија и НАТО благодарение на својата професионалност, посветеност и исполнувањето на обврските како земја-членка на Алијансата.
Тој, по повод примопредавањето на донација од Европската Унија за Армијата, упати благодарност до ЕУ за поддршката, како и до Министерството за одбрана, Генералштабот и припадниците на Армијата за нивната посветена работа.
Мицкоски нагласи дека Владата ќе продолжи да инвестира во одбраната и да ги исполнува сите обврски што произлегуваат од членството во НАТО.
Тој потсети дека при неодамнешната посета на врховниот командант на сојузничките сили на НАТО за Европа, генерал Алексус Гринкевич, Македонија добила високи оценки за инфраструктурните проекти и вложувањата во одбранбениот сектор.
Според премиерот, средствата што државата ги издвојува за одбраната достигнуваат околу четири проценти од бруто-домашниот производ, што претставува значајна инвестиција во модернизацијата и развојот на Армијата.
„Имаме јасен приоритет да инвестираме во македонската Армија и дополнително да ја зајакнеме нејзината конкурентност“, истакна Мицкоски, додавајќи дека Армијата и денес претставува професионална и подготвена сила, што беше потврдено и преку изведената воена вежба.
