Со повик на радост, вера и духовна обнова, поглаварот на Македонската православна црква – Охридска архиепископија, архиепископот Стефан, ја упати традиционалната велигденска порака до верниците, истакнувајќи ја суштината на Воскресението како победа на животот над смртта и како темел на христијанската вера.
Во своето обраќање, архиепископот нагласува дека Велигден претставува централниот настан што ја потврдува смислата на верата и надежта за спасение, но и обврска за секој верник да ја споделува таа радост со другите.
„Еве, и оваа година милостивиот Бог нè удостои да го дочекаме Празникот над празниците – Велигден! Исполнети со веселие, коешто извира од серадосниот восклик „Христос воскресе!“, ја исповедаме целата суштина и смислата на нашата вера, која, како што вели апостолот, ќе беше празна ако Христос не воскреснеше“, се вели во велигденската порака.
Тој посочува дека воскресението не е дар само за верниците, туку порака за целото човештво, повикувајќи на заедништво, љубов и духовно сведоштво.
„Оваа победа на Животот над смртта… не ни се дарувани само нам… туку за целото човештво и за сиот свет“, се вели во пораката на архиепископот Стефан.
Архиепископот упатува и повик до верниците да живеат во духот на верата, почитувајќи ги христијанските вредности и примерот на Христос.
„Со Неговото доброволно вкусување на смртта… ни ја покажа Неговата неизмерна љубов… за да преминеме и да влеземе во бесконечната радост на воскресението и животот во идниот век“, се вели во пораката.
Во обраќањето се истакнува и значењето на традицијата и духовното наследство на македонскиот народ, кој, како што наведува архиепископот, низ историјата ја чувал верата и надежта.
„Нашиот богољубив народ отсекогаш живеел со воскресенската надеж… маките и неправдите од овој свет секогаш ги поднесувал утешувајќи се со споменот за Велигден“, се вели во пораката.
Воедно, се потсетува на значајни јубилеи од македонската црковна и национална историја, кои, според него, треба да бидат поттик за зачувување на духовните и историските вредности.
„Овие незаборавни настани… нека ни бидат поттик за да го чуваме споменот за нашите достојни претшественици“, се вели во пораката.
Пораката завршува со традиционалниот велигденски поздрав и повик за духовно единство.
„Светлината на Христа воскреснатиот нека нè просвети… да објавиме на нашиот мајчин македонски јазик: Христос воскресна!“, се вели во велигденската порака на архиепископот Стефан.
