„Подобро без документи, отколку без Христа“: Свештеникот Стеван Здравески со духовна порака по најавата на електронските документи

Новите дигитални услуги и воведувањето на дигиталниот идентитет во Македонија предизвикаа реакции и во јавноста, а со своја порака се огласи и свештеникот на Македонската православна црква, Стеван Здравески.

Под насловот „Да останеме Христови во време на дигиталната заробеност“, Здравески објави духовна порака во која се осврнува на современите технолошки промени, дигиталните документи и опасноста од губење на духовната слобода.

— реклама —

Објавата доаѓа во период кога е претставена првата верзија на платформата m.Uslugi, која овозможува дигитален идентитет, електронски документи и пристап до првите мобилни електронски услуги.

Во својата објава, свештеникот предупредува дека современиот свет постепено го сведува човекот на број и код, нагласувајќи дека вистинскиот идентитет на човекот треба да остане поврзан со верата и Бога.

— реклама —

„Возљубени во Христа, животот денес нè води кон свет каде што човекот постепено се сведува на број и код. Светот ни вели дека тоа е „за наша безбедност“, но Светите Отци нè предупредуваат дека кога човекот ќе го прифати бројот наместо своето име, тогаш се губи духовната слобода и личноста Божја.

Свети Пајсиј, свети Гаврил Грузиски и свети Порфири јасно рекле: подобро е да останеш без документ отколку да го изгубиш Христос. Вистинскиот „жиг“ е духовен — кога срцето доброволно се оддалечува од Бога.

Технологијата не е грев, но опасноста е во духот на покорност и во тоа да се прифати системот наместо Христос. Нашиот вистински идентитет е во Крстот, во молитвата, во исповедта и Светата Причест. Никој број или баркод не може да го замени името впишано во Книгата на Животот.

— реклама —

Браќа и сестри, да се чуваме од духовна мрзливост и покорност кон светот. Да не се плашиме од документите, но да се плашиме од изгубената врска со Господа. Христос ни рече: „Не се плашете, Јас го победив светот!“ (Јован 16,33)

Нека нашата вера биде посилна од секој број, нашата љубов посилна од секоја контрола, а нашето срце вечно вперено во Христос, нашиот Господ.

Подобро без документи, отколку без Христа!

Амин“, наведува Здравески.