Македонските превозници и професионални возачи најавуваат протест во Скопје поради проблемите со примената на правилото 90/180 дена за престој во Шенген-зоната, за кое велат дека сериозно влијае врз работата на возачите кои секојдневно вршат меѓународен транспорт.
Асоцијацијата „МАКАМ-ТРАНС“, која ги повикува превозниците, возачите, соработниците и ВИП-членките да се приклучат на протестот, најави дека собирот ќе се одржи во понеделник, 31 август, од 12 до 14 часот, пред Делегацијата на Европската Унија во Скопје.
Од асоцијацијата бараат да се најде соодветно решение што ќе ги земе предвид специфичностите на работата на професионалните возачи и ќе им овозможи непречено да ги извршуваат транспортните услуги.
„Професионалните возачи мора да имаат соодветно решение за специфичностите на нивната работа и непречено да го остваруваат својот превоз“, порачаа од „МАКАМ-ТРАНС“.
Од Асоцијацијата ги повикаа сите засегнати да се приклучат на протестот и да испратат заедничка порака до надлежните институции.
„Само обединети можеме да бидеме слушнати“, велат од „МАКАМ-ТРАНС“.
