Од денес возачите на товарни возила и автобуси од Македонија можат да аплицираат за хрватска долгорочна виза „Д“, која може да важи до една година. Сепак, од „Макамтранс“ предупредуваат дека визата не овозможува неограничено движење и престој во останатите земји од Шенген-зоната.
Според „Макамтранс“, визата „Д“ важи исклучиво за билатерален превоз на стока, во кој се вклучени трговски друштва со седиште во Хрватска. При влез во Хрватска, возачот треба да пријави каков вид превоз врши, а доколку станува збор за билатерален превоз меѓу Македонија и Хрватска, деновите поминати во Хрватска нема да се бројат во дозволениот престој.
Ситуацијата е различна доколку возачот транзитира низ Хрватска кон друга земја од Шенген-зоната. Во тој случај, хрватската виза „Д“ престанува да важи со напуштањето на Хрватска, а возачот се евидентира во Системот за влез/излез (EES).
Тоа значи дека деновите поминати во другите земји од Шенген-зоната ќе се сметаат според правилото за максимален престој од 90 дена во кој било период од 180 дена.
Главната поволност за македонските возачи кои транзитираат низ Хрватска е што времето поминато на нејзина територија нема да им се брои во дозволениот престој.
Барањата за хрватската виза „Д“ се поднесуваат најрано два месеца, а најдоцна 30 дена пред планираниот почеток на превозот на стока или патници. Апликацијата се поднесува преку електронскиот систем „Crovisa“, по што документацијата треба физички да се достави во надлежната амбасада на Хрватска.
Таксата за визата изнесува 93 евра.
Проблемот со ограничувањето на престојот во Шенген-зоната Македонија го решава и преку билатерални договори со земјите низ кои минуваат македонските превозници. Досега се потпишани договори со Хрватска, Швајцарија и Романија, додека се работи и на договори со Австрија, Унгарија и Германија.
