Францускиот претседател Емануел Макрон денеска му се заблагодари на британскиот премиер Кир Стармер, истакнувајќи ја неговата посветеност кон Украина и придонесот во обновувањето на односите меѓу Обединетото Кралство и Европската Унија.
Во објава на социјалната мрежа Икс, Макрон му се заблагодари на Стармер за неговиот придонес во зајакнувањето на француско-британските односи, како и за неговата улога во Коалицијата на подготвените за поддршка на Украина.
„Сакам да му се заблагодарам на премиерот Кир Стармер за неговиот придонес во зајакнувањето на француско-британските односи, неговата посветеност во рамките на Коалицијата на подготвените за Украина, како и за обновувањето на односите меѓу Обединетото Кралство и Европската Унија“, напиша Макрон.
Францускиот претседател додаде дека ќе продолжи да работи во истиот правец „во интерес на нашите народи и на Европа“.
Стармер денеска поднесе оставка од функцијата на британски премиер и лидер на Лабуристичката партија по зголемениот притисок во редовите на партијата. Номинациите за негов наследник ќе бидат отворени до 9 јули, а за главен фаворит се смета Енди Барнам.
Британските медиуми претходно објавија дека оставката на Стармер е очекувана, иако извори од Владата тврдеа дека тој останува фокусиран на водењето на земјата. Притисокот врз него дополнително се зголеми по изборниот успех на неговиот внатрепартиски ривал, Енди Барнам.
