Францускиот претседател Емануел Макрон денеска ги отфрли коментарите на американскиот претседател Доналд Трамп за неговиот приватен живот, оценувајќи дека тие „не заслужуваат одговор“.
Реагирајќи на новинарско прашање за изјавите на Трамп дека „сопругата на Макрон лошо се однесува кон него“ и дека францускиот претседател „едвај се опоравува од удар во вилица“, Макрон рече дека ваквите зборови „не се ниту елегантни ниту примерни“.
Во Франција следуваа и политички реакции. Претседателката на францускиот парламент Жаел Брон-Пиве оцени дека коментарите се непримерни и дека во момент кога се отвораат теми со глобални последици, јавниот дискурс се спушта на лични навреди.
„Во моментов разговараме за иднината на светот. Во Иран се случува нешто што има последици врз животите на милиони луѓе, луѓе умираат на бојното поле, а имаме претседател кој се смее и им се потсмева на другите“, порача Брон-Пиве.
Осуда пристигна и од левицата. Пратеникот на „Непокорена Франција“, Мануел Бомпар, нагласи дека и покрај неговите несогласувања со Макрон, ваквиот начин на говор за него и неговата сопруга е „апсолутно неприфатлив“.
Според наводите, Трамп ваквите квалификации ги изнел во обраќање, тврдејќи дека од Макрон побарал француска помош преку испраќање бродови за отворање на Ормускиот Проток, но дека француската страна одбила. Трамп тврдеше дека Макрон одговорил оти Франција може да прати бродови „кога ќе се добие војната“, на што тој реагирал дека помошта не му треба по завршувањето на конфликтот.
Во продолжение на тензиите, Макрон повторил дека Франција „не била консултирана“ за почнувањето на војната на САД и Израел против Иран и дека „не учествува“ во неа.
