Макрон, Стармер и Мерц ќе се сретнат со Зеленски во Лондон

Францускиот претседател Емануел Макрон, британскиот премиер Кир Стармер и германскиот канцелар Фридрих Мерц задутре ќе одржат средба со украинскиот претседател Володимир Зеленски во Лондон, соопшти Елисејската палата.

Според соопштението, лидерите ќе разговараат за натамошната поддршка за Украина и за дополнително зголемување на притисокот врз Русија.

— реклама —

„Средбата ќе овозможи продолжување на блиската координација околу нашата заедничка агенда за понатамошна поддршка на Украина и зголемување на притисокот врз руските воени напори“, се наведува во соопштението.

Од Елисејската палата оценуваат дека Русија се соочува со воени, економски и стратешки неуспеси, но и понатаму ја продолжува војната без значителен напредок на фронтот.

— реклама —

Во меѓувреме, Зеленски ги повика европските сојузници да ги интензивираат напорите за завршување на војната, изразувајќи загриженост дека вниманието на американскиот претседател Доналд Трамп во моментов е насочено кон кризата со Иран.

Украинскиот претседател вчера преку отворено писмо го повика рускиот претседател Владимир Путин на директна средба со цел да се постигне договор за ставање крај на војната, која трае повеќе од четири години. Од Кремљ потврдија дека Путин е запознаен со содржината на писмото.

— реклама —

Макрон денеска изјави дека Франција отсекогаш се залагала за директни преговори меѓу Украина и Русија.

„Сметам дека токму Украина и Русија можат да изградат и прекин на огнот и мировен план, а Европа може да помогне во тој процес“, изјави францускиот претседател.

— реклама —

Германскиот канцелар Фридрих Мерц, кој денеска престојуваше во Црна Гора, порача дека европските земји остануваат отворени за дијалог.

„Отворени сме за дијалог, но она што недостига е волјата на Путин“, изјави Мерц.