Три лица починаа од маларија во Франкфурт, иако ниту едно од нив не престојувало во подрачја каде што оваа болест е вообичаена. Случаите се регистрирани во населбата Шванхајм, на околу пет километри од аеродромот, поради што надлежните служби ја разгледуваат можноста инфекцијата да ја пренел заразен комарец што пристигнал со авион.
Последната жртва починала на 17 септември. Два дена претходно биле пријавени два случаи на маларија во Шванхајм, од кои едниот пациент подоцна починал. На овие случаи им претходела инфекција кај шестмина вработени на аеродромот во јули, од кои двајца починале.
Според германските медиуми, здравствените власти претпоставуваат дека таканаречената „аеродромска маларија“ би можела да биде поврзана со заразен комарец кој пристигнал во Франкфурт со авион. Сепак, засега нема потврда за потеклото на инфекцијата. Ниту едно од заразените лица во Шванхајм не било вработено на аеродромот.
Градската здравствена служба во населбата поделила околу 5.000 информативни летоци со совети за препознавање на симптомите и за заштита од комарци. Граѓаните се советуваат да користат мрежи на прозорците, средства против комарци и облека со долги ракави.
Иако здравствените власти моментално го оценуваат ризикот од нови инфекции како низок, не ја исклучуваат можноста за појава на нови случаи. Маларичните симптоми најчесто се појавуваат седум до 30 дена по убодот, а зависно од предизвикувачот, периодот може да биде и подолг.
Меѓу најчестите симптоми се висока телесна температура и треска, но може да се појават и главоболка, болки во зглобовите и изразена слабост. Здравствените служби нагласуваат дека раното препознавање и навремената дијагноза се особено важни за успешно лекување.
Од здравствената служба објаснуваат дека во Германија при висока температура лекарите не се посомневаат веднаш на маларија, бидејќи болеста најчесто се поврзува со патувања во ризични подрачја. Тоа може да претставува дополнителен предизвик кај случаи на таканаречена „аеродромска маларија“.
Од компанијата „Фрапорт“, која управува со аеродромот во Франкфурт, соопштиле дека вработените од август се детално информирани за ситуацијата. Во околината на аеродромот се поставени и стапици за комарци, а фатените инсекти се испраќаат на анализа во Институтот за тропска медицина во Антверпен, со цел да се утврдат нивниот вид и потекло.
Од „Луфтханза“ соопштиле дека засега не се врши целно прскање на кабините на авионите со инсектициди, бидејќи, како што наведуваат, германските власти немаат издадено конкретни упатства за таква мерка.
И покрај зголеменото внимание во јавноста, жителите на Шванхајм засега не пријавуваат поголема загриженост. Дел од нив велат дека случаите се тема на разговор во населбата, но оти не забележуваат страв кај граѓаните.
