Трет човек почина од маларија во Франкфурт, по што градските здравствени власти презедоа дополнителни мерки за информирање на населението во населбата Шванхајм, во близина на аеродромот.
Здравствената служба поделила 5.000 летоци, во кои жителите се информираат за симптомите на маларијата, меѓу кои се покачена телесна температура и треска. На граѓаните им се препорачува заштита од комарци со мрежи на прозорците, средства за заштита и облека со долги ракави.
Последната жртва починала на 17 септември. Два дена претходно биле пријавени два случаи на зараза во Шванхајм. Еден од заразените подоцна починал. Ниту едно од лицата немало престојувано во подрачја каде што маларијата е вообичаена, ниту работело на аеродромот.
На овие случаи им претходела зараза кај шестмина вработени на аеродромот во јули, од кои двајца починале.
Од градската здравствена служба објаснуваат дека високата смртност може да се поврзе и со тоа што во Германија при појава на висока температура лекарите не помислуваат веднаш на маларија, особено кога станува збор за таканаречена „аеродромска маларија“ кај лица кои не патувале во ризични подрачја.
Од компанијата „Фрапорт“, која управува со аеродромот во Франкфурт, велат дека од август сите вработени се детално информирани за состојбата и дека им се советува веднаш да побараат лекарска помош доколку почувствуваат симптоми. Во близина на аеродромот се поставени и стапици за комарци, а уловените инсекти се испраќаат на анализа во Институтот за тропска медицина во Антверпен.
Од „Луфтханза“, пак, соопштија дека засега не спроведуваат целно прскање на кабините на авионите со инсектициди, бидејќи германските власти немаат издадено посебни упатства за таква постапка.
