Србија во наредните недели треба да ја добие првата фабрика за хуманоидни роботи, која ќе биде лоцирана во Шабац и ќе има капацитет за производство од 1.000 до 2.000 роботи годишно, најави српскиот министер за финансии Синиша Мали.
Според него, фабриката треба да биде завршена во рок од месец и половина, а до крајот на годината се очекува да биде отворен и специјализиран центар за обука на роботите.
„Кога ќе создадете робот, мора да го обучите. Тие можат да извршуваат различни задачи, од подготовка на кафе и услуга во хотели, па сè до примена во воената индустрија“, изјави Мали.
Тој објасни дека следната фаза од развојот ќе биде интеграција на вештачка интелигенција, што ќе им овозможи на роботите постојано да учат и да ги користат податоците и знаењата од различни центри ширум светот.
Мали посочи дека роботите имаат предност бидејќи можат да работат непрекинато, без паузи и одмор, наведувајќи како пример фабрика на кинеската компанија Xiaomi, каде што, според него, производниот процес е речиси целосно автоматизиран.
Тој оцени дека проектот претставува значаен чекор за српската економија и дел од пошироката соработка со Кина во областа на новите технологии. Според министерот, кинескиот претседател Си Џинпинг најавил 50 нови истражувачки проекти со институции во Србија, насочени кон развој на иновации и современи технолошки решенија.
„Од земја која пред 15 години беше на работ на банкрот, денес зборуваме за роботи, вештачка интелигенција, иновации и истражувачки центри. Тоа е иднината и Србија нема да заостанува, туку ќе биде меѓу водечките во примената на овие технологии“, изјави Мали.
