Малолетник со два ножа нападна жандарм пред израелската амбасада во Белград

Србија го подигна нивото на терористичка закана на највисоко, „црвено“ ниво по нападот врз припадник на Жандармеријата пред Амбасадата на Израел во Белград. Напаѓачот бил убиен при интервенцијата на полицискиот службеник, кој се здобил со полесна повреда на лицето.

— реклама —

Според српскиот министер за внатрешни работи во технички мандат, Ивица Дачиќ, нападот се случил 15 минути по полноќ, кога малолетник, за кого постои сомневање дека е од Шабац, го нападнал жандармот со два ножа, извикувајќи „Алаху Акбар“.

Дачиќ изјави дека безбедносните служби претходно го следеле напаѓачот и дека, според досегашните сознанија, тој бил поддржувач на „Исламската држава“. На неговиот профил на Инстаграм, наводно, имало црно знаме и амблем на организацијата.

— реклама —

По нападот, наредени се засилени безбедносни проверки и поголемо полициско присуство на локации од посебно значење, вклучително и инфраструктурни објекти и места каде што се собираат голем број граѓани.

— реклама —

Дачиќ соопшти дека го посетил повредениот припадник на Жандармеријата заедно со директорот на полицијата, Драган Васиљевиќ. Според него, жандармот е во добра состојба и се очекува да биде отпуштен од болница во текот на денот. Истрагата за нападот е во тек.