Портпаролот на ВМРО-ДПМНЕ, Валентин Манасиевски, беше гостин во емисијата ,,Колегиум“, на телевизија Алфа и се осврна на темата за поранешниот министер за земјоделие, Љупчо Николовски, откако тој побара извинување за неговите изјави. Тој се осврна и на наодот кој Николовски го направил и постави прашања околу неговата поврзаност со СДС, како и за околностите во кои бил изготвен наодот.
,,Таа е таа клапа, на Зоран Заев, на Венко Филипче, на Љупчо Николовски. Тоа е тоа трио што го води СДС. Тој упати барање за извинување кон мене, на одредени прес-конференции, што според него се невистинити. Тоа ќе си го проследат и правосудните органи. Тој не е надлежен да кажува кој кажува вистини, кој кажува лаги, си има институции државата и тие ќе си постапат“, рече Манасиевски.
Манасиевски истакна дека не прифатил да му се извини, бидејќи, како што вели, неговите изјави се однесувале на конкретни прашања поврзани со стоковите резерви.
,,Секако дека не му се извинив. Затоа што моите прес-конференции му нанеле нему душевна болка, а тоа е затоа што се има случено отпис на кусокот на стоковите резерви, околу 2000 тона жито, и тоа го имаат одобрено на владина седница“, кажа Манасиевски.
Манасиевски се повика на јавно достапни податоци поврзани со евиденцијата на стоковите резерви, при што посочи дека според информациите со кои располага, до 2019 година не бил евидентиран кусок на жито. Оттука, тој ја постави временската рамка во која, според него, можел да настане кусокот и ја поврза со периодот кога Љупчо Николовски бил министер за земјоделство, а потоа и вицепремиер.
,,Откако се случува тој отпис, односно известување до Владата, што тие го потпишуваат на владина седница, потоа се случува оној најголем грант дотогаш во историјата од ИПАРД-програмата од 1,4 милиони евра, на фирмата ,,Трго продукт“, или попозната по брендот ,,Мамас“ на Заеви, таа фирма добива од ИПАРД-програмата грант од 1,4 милиони евра“, истакна Манасиевски и додаде:
,,Моето прашање што го поставив до Љупчо Николовски е дали е ова награда за него, затоа што овие му отпишале кусок, односно Заеви и Филипче, дали е награда за Зоран Заев овој грант од 1,4 милиони евра. Секако, тој тоа не го одговори, односно упати тужба за извинување од мене бидејќи јас сум го клеветел и тоа му нанело душевна болка“.
Манасиевски го отвори и прашањето поврзано со вештиот наод што го направил Николовски и добил мислење од докторот Стојан Бајрактаров, кој е член на СДС, како и повеќекратен донатор на СДС, токму кога Љупчо Николовски ја имал функцијата генерален секретар на партијата.
,,Тука има директни индиции дека нешто можеби е исценирано и јас тоа го прашав Љупчо Николовски денеска на прес-конференцијата. Дали докторот Стојан Бајрактаров, по барање на Љупчо Николовски, изготвил можеби лажен извештај за тоа. Станува збор за повеќекратно донирање суми пари, дали се големи или мали, тоа сега јас не можам да кажам. Сепак е неколкупати и токму во време кога Николовски е генерален секретар на партијата, токму во времето кога Љупчо Николовски е член на СДС, на владина седница кога ги бираат директорите на државните клиники, токму со неговиот глас и останатите членови на Владата, докторот станува директор на Клиниката за психијатрија“, посочи Манасиевски.
Тој се осврна и на тоа како воопшто започнала темата со која подоцна тој излегол во јавноста.
,,Ова е минатата година во декември, имавме серија прес-конференции, каде што тоа беше прво изнесено јавно преку портали, каде што беа приведени неколку лица, меѓу кои и поранешниот министер Трајан Димковски. Потоа, ние се приклучивме на темата со серија прес-конференции, каде што побаравме одговори од претходниот министер за земјоделие и поранешен вицепремиер“, заклучи Манасиевски.
