Поранешниот вицепремиер за евроспки прашања, Бојан Маричиќ негира дека продал археолошко наоѓалиште на Анѓушев за фотоволтаици. Но не негира дека парцела била продадена со одлука на Влада, на седница со која тој раководел.
„Целосна невистина е пропагандата на Левица дека наводно јас “сум продал археолошко наоѓалиште на Анѓушев за фотоволтаици”.
Еве ги фактите:
Јас, ниту како министер за правда, ниту како вицепремиер за европски интеграции никогаш не сум имал надлежности за оттуѓување државно земјиште.
Се злоупотребува тоа што јас сум претседавал со одредена седница на Влада, по налог на премиерот, на која седница оваа точка била на дневен ред.
Одлуките од овој карактер задолжително се носат со мнозинство гласови, како колективни одлуки на владата, но исклучиво после добиено позитивно мислење од сита надлежни институции.
Во овој случај, како што веќе известија медиумите, претходно позитивно мислење дале сите релевантни институции, а особено важно е што Националниот конзерваторски центар и Управата за заштита на културното наследство дале мислења дека нема културно наследство што е загрозено со отуѓување на оваа парцела.
Во вакви случаеви, оној кој претседава со седница на Влада има обврска да ја стави точката на дневен ред и да побара мислење од Владата.
Заклучок: Левица тера лажна пропаганда, Владата донела одлука врз основа на претходни позитивни мислења од сите засегнати институции, а јас како вицепремиер само сум ја водел таа седница на Влада, по налог на премиерот кој бил оправдано отсутен“.
