Марш за Халанд: „60 милиони? Аха, како да не!“

Аферата околу Манчестер Сити и понатаму е една од главните теми во фудбалскиот свет, а меѓу последните што јавно го коментираа случајот е Џеси Марш, поранешен тренер на Лидс Јунајтед и актуелен селектор на Канада.

Лидс во 2023 година испадна од Премиер лигата, во една од сезоните опфатени со истрагата против Манчестер Сити. Марш смета дека клубовите во Англија со години биле свесни дека се случуваат работи што не се во согласност со правилата.

— реклама —

„Мислам дека Манчестер Сити треба строго да биде казнет. Треба да биде исфрлен во понизок ранг. А сепак, искрено кажано, сите знаеја за тоа. Баш сите. Не знам зошто требаше толку време за сето тоа да излезе на виделина“, изјави Марш во интервју за „Гардијан“.

Тој особено се осврна на летото 2022 година, кога Лидс и Манчестер Сити биле меѓу ретките клубови што пријавиле профит.

— реклама —

„Тоа лето ние и Манчестер Сити бевме единствените што пријавивме профит. Ние навистина го остваривме тој профит, со продажбата на Рафиња во Барселона и Калвин Филипс. Ни останаа доста пари по сите купувања. Но нашите сопственици немаа неограничен буџет, не претерувавме. Кога од Сити го тврдеа истото, буквално се прашував: добро, дали се шегувате? За што станува збор?“, рече Марш.

Американецот го спомна и трансферот на Ерлинг Халанд од Борусија Дортмунд во Манчестер Сити. Според него, сумата за која трансферот бил прикажан предизвикала сомнеж.

— реклама —

„Рекоа дека го донеле Халанд за 60 милиони евра! Мојата реакција беше: Аха, во ред, сигурно било така. Значи, знаев дека има недоследности. Халанд во тој момент чинеше 150 милиони. Но што можевме да направиме? Само да кренеме раменици“, изјави Марш.

Трансферот на норвешкиот напаѓач подоцна привлече дополнително внимание поради наводите за исплати кон неговиот татко Алф-Инге Халанд и тогашниот агент Мино Рајола.

Според дел од извештаите, тие исплати изнесувале најмалку 40 милиони евра, додека се појавија и наводи дека Борусија Дортмунд од трансферот добила повеќе од 60-те милиони евра што во јавноста се наведуваа како откупна клаузула.

Постапката поврзана со Манчестер Сити трае со години, а конечниот исход би можел да има сериозни последици за клубот и за Премиер лигата.