Марта Кос: Важен ден за проширувањето, Црна Гора затвора уште две поглавја

Црна Гора би можела да стигне до завршницата на преговарачкиот процес со Европската Унија за време на ирското претседателство со Советот на ЕУ, доколку продолжи со исполнувањето на обврските и ја задржи поддршката од европските институции и земјите членки, изјави европската комесарка за проширување Марта Кос.

Таа ова го изјави пред почетокот на состанокот на Советот за надворешни работи на Европската Унија во Луксембург, каде што денеска ќе се одржи и меѓувладината конференција меѓу ЕУ и Црна Гора.

— реклама —

Кос потсети дека денеска ќе бидат затворени уште две преговарачки поглавја со Црна Гора, со што вкупниот број на затворени поглавја ќе се искачи на 16.

„Тоа е приближно половина од вкупната работа што Црна Гора треба да ја заврши“, рече Кос.

— реклама —

Таа посочи дека неодамна престојувала во Ирска, која наскоро ќе го преземе претседателството со Советот на ЕУ, и оцени дека, доколку Европската комисија, Црна Гора и земјите членки продолжат со заедничка работа, можно е преговорите да бидат приведени до крај.

Според Кос, процесот на проширување денес претставува еден од најважните инструменти на надворешната политика на Европската Унија.

— реклама —

„Во последните 16 или 17 месеци постигнавме повеќе отколку во претходните 15 години“, изјави таа.

Комесарката додаде дека денешниот ден е значаен за политиката на проширување, потсетувајќи дека Украина и Молдавија ќе направат голем исчекор со отворањето на првиот кластер од преговорите, а изрази очекување дека до јули би можеле да ги отворат и преостанатите пет кластери доколку ги исполнат условите.

„Ова е ден за славење, но и можност да ги повикаме земјите кандидати да го задржат темпото на преговорите“, порача Кос.

Црна Гора досега има затворено 14 од вкупно 33 преговарачки поглавја, а според планот на Владата во Подгорица, до крајот на годината треба да бидат затворени сите поглавја, со цел земјата во 2028 година да стане членка на Европската Унија.