Масакр на пазар во Сирија: Експлодираше автомобил-бомба, при што загинаа најмалку 7 лица, меѓу кои и деца

Најмалку седум лица загинаа, а околу 30 се ранети по експлозија на автомобил-бомба на фреквентен пазар во градот Азаз, во провинцијата Алепо, на северот на Сирија, во близина на границата со Турција.

— реклама —

На снимките објавени на социјалните мрежи се гледаат тела на луѓе на земја, оштетени згради и остатоци од запалени автомобили, јавува Би-Би-Си. Бели шлемови, волонтерска спасувачка група која оперира во Сирија, соопшти дека меѓу загинатите има две деца.

— реклама —

Истрагата е во тек, а засега никој не ја презел одговорноста за нападот. Градот Азаз е контролиран од милиции кои се борат против сирискиот претседател Башар Ал Асад во граѓанската војна, а во градот се наоѓа и седиштето на преодната влада, опозициска група која тврди дека е легитимна влада во Сирија.

— реклама —

Аналитичарите сметаат дека овој град е стратешки важен како рута за снабдување и поради неговата близина до турската граница. Бомбашките напади врз прометните цивилни области не се невообичаени во северозападниот пограничен регион на Сирија, вклучувајќи го и Азаз.

Во напад во 2017 година, повеќе од 40 луѓе беа убиени кога автомобил-бомба експлодираше пред зградата на судот во тој град, а одговорноста ја презеде Исламската држава.