Илон Маск со години ја претставува Европа како континент со сериозни проблеми со криминалот, миграцијата и слободата на говорот, но според анализата на „Економист“, податоците не ги потврдуваат неговите тврдења.
Во неодамнешен разговор со главната уредничка на „Економист“, Зани Минтон Бедоус, Маск тврдеше дека во Европа постојат бројни места каде што повеќе не е безбедно да се оди пеш, а криминалот и насилството се надвор од контрола.
Разговорот следеше откако Маск на платформата X го промовираше филмот „Citizen Vigilante“, кој Европа ја прикажува како дистописко место погодено од насилство поврзано со мигрантите. Филмот по неговата промоција собра повеќе од 10 милиони прегледи и доби голема поддршка од десничарската публика, но значително полоши оценки од филмските критичари.
Кога Бедоус посочила дека САД имаат поголеми проблеми со безбедноста, меѓу другото и поради лесната достапност на оружје, Маск возвратил дека во Европа силувањата и убиствата се надвор од контрола.
„Економист“ потоа објави анализа во која ги спореди податоците за криминалот во САД и Европа. Според нив, тие не ја потврдуваат тезата дека САД се побезбедни.
Еден од најрелевантните показатели е стапката на убиства, бидејќи различните држави имаат различни начини на евидентирање на останатите видови криминал. Во Европската Унија во 2024 година биле регистрирани 3.953 намерни убиства, односно околу 0,88 на 100.000 жители. Во САД стапката била околу 5,5 пати повисока.
Ниту тврдењето дека во Велика Британија растат убиствата со нож не е потврдено со податоците. Во Англија и Велс во годината, заклучно со март 2025 година, со остар предмет биле убиени 205 лица, односно околу 0,34 на 100.000 жители. Тоа е за 21 отсто помалку од претходната година и најниско ниво од 2015 година.
Разлика има и кај затворската популација. Во ЕУ во 2024 година имало околу 509.000 затвореници, односно 113 на 100.000 жители, додека во американските затвори и притворски установи бројката била околу 1,83 милиони, или приближно 542 на 100.000 жители.
Анализата покажува разлики и во очекуваниот животен век и смртноста кај новороденчињата. Во ЕУ во 2024 година очекуваниот животен век бил 81,5 години, наспроти 79 години во САД. Смртноста кај новороденчињата била 3,5 на 1.000 живородени во ЕУ, во споредба со 5,52 во САД.
„Економист“ ги разгледува и тврдењата за миграцијата и криминалот. Според анализата, големи истражувања не потврдуваат дека миграцијата значително го зголемува криминалот. Разликите во застапеноста на мигрантите меѓу осомничените во одредени европски земји значително се намалуваат кога ќе се земат предвид фактори како возраста, полот, сиромаштијата, образованието и невработеноста.
Маск често ја критикува и Европа поради наводното ограничување на слободата на говорот. Сепак, анализата наведува дека и САД под администрацијата на Доналд Трамп бележат сериозни критики во оваа област, вклучително и пад на позицијата на индексот на „Репортери без граници“.
Според „Економист“, кога ќе се погледнат податоците за криминалот, безбедноста, демографијата и слободата на говорот, тие не ја потврдуваат сликата за Европа како континент кој пропаѓа и станува сè понебезбеден, како што тврди Маск.
