Маж бил каснат од змија во близина на автобуската станица во Ниш, по што бил задржан на Инфективната клиника за набљудување.
Инцидентот се случил на булеварот „12 Февруари“, каде што змијата го каснала мажот за ногата. По лекарскиот преглед било утврдено дека станува збор за неотровна змија, поради што немало потреба од примена на серум.
Поради претпазливост, мажот бил задржан преку ноќ на клиниката, а денеска се очекува да биде пуштен дома.
Херпетологот Данко Јовиќ објаснува дека појавата на змии во градските средини не е невообичаена, особено во области каде што има глодари. Според него, најчесто станува збор за неотровни змии кои не напаѓаат, освен ако се почувствуваат загрозени.
Тој додава дека каснувањето од неотровна змија најчесто не е опасно, но лекарска помош може да биде потребна доколку дојде до инфекција на раната.
