Медведев: Изјавите на Трамп нема да ѝ донесат победа на Русија

Рускиот политичар Дмитриј Медведев порача дека Русија нема да ја доближат до победа во војната против Украина изјавите на американскиот претседател Доналд Трамп, туку руското оружје. Неговата реакција следуваше откако Трамп повторно го критикуваше украинскиот претседател Володимир Зеленски поради тоа што не постигнал договор со Русија.

Трамп изјави дека Зеленски би бил во многу подобра позиција доколку постигнел договор пред две години. Според американскиот претседател, украинскиот лидер имал повеќе можности за спогодба за време на војната, но не ги искористил.

— реклама —

Медведев, заменик-претседател на Советот за безбедност на Русија, реагираше преку руската платформа „Макс“, предупредувајќи дека изјавите на Трамп не треба да се толкуваат како промена на американската политика во корист на Москва.

„Трамп? Тој никогаш не го менува ставот, што ни е добро познато. Затоа, вие што премногу се возбудивте, смирете се. До победа нè доближуваат исклучиво нашите балистички ракети и беспилотните летала „Геран““, напиша Медведев.

— реклама —

Неговата порака доаѓа во период кога Трамп повторно го засилува притисокот врз Киев и сè поотворено ја префрла одговорноста за отсуството на мировен договор врз Зеленски.

— реклама —

Американскиот претседател отиде и чекор понатаму, доведувајќи го во прашање останувањето на Зеленски на чело на Украина.

„Мислам дека е време Украина да добие нов лидер“, изјави Трамп, додавајќи дека тоа треба да биде личност што може да постигне договор за завршување на војната. Според него, Зеленски од засега необјаснети причини не успеал да го направи тоа.

Трамп директно повика и на одржување претседателски избори во Украина.

„Сметам дека треба да одржи избори“, рече американскиот претседател.