Медведев се закани по апсењето на руски блогер во Црна Гора: „Можеме да го прошириме списокот на уапсени Европејци“

Црна Гора го уапси и протера Михаил Звинчук, руски воен блогер и основач на телеграм-каналот Rybar. Кремљ вчера соопшти дека преку своите дипломати ќе побара објаснување за неговото приведување. Ова го потврди портпаролот на Кремљ, Дмитриј Песков, а веста прва ја објави руската државна агенција ТАСС.

Црногорскиот премиер Милојко Спајиќ го потврди апсењето и го нарече „успешна операција“. Тој порача дека Црна Гора ги штити своите интереси и дека „никој нема да ја загрози нашата европска иднина“.

— реклама —

„Предупредувавме дека нашиот европски пат постојано е проследен со обиди за хибридно мешање и дестабилизација“, објави Спајиќ на социјалната мрежа Икс.

Тој наведе дека надлежните служби ги проверуваат доказите и поврзаноста на уапсените лица, но дека чувствителните информации засега нема да бидат објавени.

Неколку часа по апсењето, Звинчук бил и протеран од земјата, соопшти црногорското Министерство за внатрешни работи.

— реклама —

Црногорските власти им го поништиле престојот на петмина руски државјани и им издале решенија за протерување поради националната и внатрешната безбедност, се наведува во соопштението на Министерството.

Операцијата била спроведена со поддршка на меѓународни партнери, а властите не објавиле во која земја ќе бидат упатени руските државјани.

— реклама —

Портпаролот на Кремљ, Дмитриј Песков, за ТАСС изјави дека руските дипломати ќе ги утврдат причините за апсењето.

„Нашите дипломати ќе ги утврдат причините за апсењето и, како и во случајот со секој руски државјанин, ќе ги штитат неговите права“, изјави Песков.

Се огласи и Дмитриј Медведев, заменик-претседател на Советот за безбедност на Русија. На Телеграм објави дека европските земји прогласиле „лов“ на „сите“ Руси и сугерираше дека Москва би можела да го прошири списокот на уапсени Европејци и Американци, за да ги искористи за размена и враќање на руски државјани.

На телеграм-каналот Rybar беше објавено дека Звинчук бил уапсен заедно со уште неколку руски државјани. Во објавата се истакнува дека сите престојувале во Црна Гора легално и службено.

„Планирале да снимаат во Цетињскиот манастир, за што претходно било испратено официјално барање“, се наведува во соопштението на каналот.