Меѓународно признание за УЈП: Македонија на чело на IOTA во следната година

Управата за јавни приходи (УЈП) го презеде едногодишното претседателство со Интеревропската организација на даночни администрации (IOTA) на свечена церемонија одржана во рамки на 30-тото Годишно собрание на организацијата во Будимпешта.

Претседателството симболично беше предадено преку церемонија на примопредавање на знамето на IOTA, при што в.д. директорката на Националната даночна и царинска администрација на Унгарија, Чила Тамаш Цзинеге, ѝ го предаде знамето на директорката на УЈП, м-р Елена Петрова.

— реклама —

Во своето обраќање, директорката Петрова истакна дека даночните администрации денес се соочуваат со брзи технолошки промени, нови економски модели и сè поголеми очекувања од граѓаните и бизнис-заедницата.

„IOTA не треба да биде само место каде даночните администрации разговараат за промените, туку место каде заедно ги претвораат предизвиците во конкретни решенија“, истакна Петрова.

— реклама —

Таа нагласи дека улогата на IOTA е да им помогне на даночните администрации успешно да ги претворат предизвиците во можности преку практична соработка, размена на искуства и заедничко јакнење на капацитетите.

По церемонијата, Петрова го предводеше и конститутивниот состанок на новиот состав на Извршниот совет на IOTA, во кој членуваат претставници од Азербејџан, Белгија, Ерменија, Естонија, Романија, Финска, Хрватска и Швајцарија.

— реклама —

Во рамки на Генералното собрание, директорката на УЈП учествуваше и на панел-дискусија заедно со директорите на даночните администрации на Азербејџан, Естонија, Украина, Унгарија и Хрватска, посветена на стратешките приоритети на даночните администрации и идната улога на IOTA.

На дискусијата било нагласено значењето на дигиталната трансформација, како и потребата даночните администрации да ја зачуваат довербата на јавноста во услови на брзи технолошки и економски промени.

IOTA е организација во која членуваат 43 европски земји и две придружни членки и соработува со бројни меѓународни институции и организации што работат во областа на даночната политика.

Од УЈП оценуваат дека преземањето на претседателството со IOTA претставува значајно меѓународно признание за институцијата и потврда за нејзината улога како активен и кредибилен партнер во европската даночна заедница.