Меркел загрижена поради јакнењето на екстремите во Германија: „Умереноста сè повеќе исчезнува“

Поранешната германска канцеларка Ангела Меркел изрази загриженост поради сè поголемото јакнење на политичките екстреми во Германија, но оцени дека сè уште постои можност за зачувување на политичкиот центар.

Во интервју за „Магента ТВ“, снимено во берлинскиот музеј „Боде“, Меркел порача дека Христијанско-демократската унија (ЦДУ) треба да понуди поширока политичка платформа што ќе обединува различни општествени групи.

— реклама —

„Ме загрижува тоа што екстремите стануваат сè посилни, а умереноста, која за мене отсекогаш била многу важна во политиката, сè повеќе исчезнува“, изјави таа, осврнувајќи се на изборните успеси на Алтернативата за Германија (АфД) и Левицата.

Меркел ја поддржа одлуката на ЦДУ да ја задржи забраната за соработка со АфД и Левицата, но истовремено упати критики и кон одредени ставови на Левицата, особено во однос на НАТО и проблемот со антисемитизмот во делови од партијата во Берлин.

— реклама —

Говорејќи за политичката стратегија на актуелниот лидер на ЦДУ и германски канцелар Фридрих Мерц, таа оцени дека концептот на „чиста ЦДУ“ не треба да се сведува само на економската политика. Според неа, партијата треба да биде мост меѓу работниците и работодавачите, граѓаните со мигрантско потекло и оние што долго живеат во Германија, како и меѓу урбаните и руралните средини.

„Тоа е чистата ЦДУ – политичка понуда за секој граѓанин“, порача Меркел.

Во интервјуто таа се осврна и на здравствените проблеми од 2019 година, кога за време на воени почести имаше напад на тресење. Објасни дека тоа најверојатно било телесна реакција на големите лични оптоварувања, меѓу кои смртта на нејзината мајка и сознанието дека наскоро ќе ја напушти канцеларската функција. Поради тоа, одлучила во иднина воените церемонии најчесто да ги следи седејќи.

— реклама —

Меркел изрази желба Германија да ја добие својата прва жена претседател, оценувајќи дека во ЦДУ и Христијанско-социјалната унија (ЦСУ) има жени со соодветни квалификации за функцијата.

Во однос на безбедноста на Европа, таа истакна дека е потребно да се изгради доволно силна одбранбена способност за одвраќање на евентуален руски напад врз НАТО. Притоа призна дека за време на нејзиниот канцеларски мандат, особено по 2015 година, издвојувањата за одбраната не се зголемувале доволно брзо.

Поранешната канцеларка повтори и дека ја смета за исправна одлуката за напуштање на нуклеарната енергија, оценувајќи дека таа придонела за намалување на општествените поделби во Германија.

Ангела Меркел беше на чело на германската влада од 2005 до 2021 година.