Компанијата Мета отпушти 10 проценти од својата работна сила, потег кој се очекуваше речиси еден месец, додека компанијата паралелно ги засилува инвестициите во вештачка интелигенција.
Извршниот директор Марк Закерберг во интерен допис до вработените ги објаснил причините за реорганизацијата и идниот правец на компанијата.
Тој им се заблагодарил на отпуштените работници, нагласувајќи дека вештачката интелигенција е „најважната технологија на нашето време“, додавајќи дека компаниите кои ќе бидат лидери во оваа област ќе ја обликуваат следната генерација.
Покрај отпуштањата, Мета пренасочува околу 7.000 вработени на позиции поврзани со вештачка интелигенција, објави NBC News.
Реорганизацијата вклучува укинување на околу 8.000 работни места, како и непополнување на дополнителни 6.000 отворени позиции.
Компанијата уште во април најави дека за 2026 година ќе ги зголеми капиталните трошоци на меѓу 125 и 145 милијарди долари, наведувајќи дека причините се повисоките цени на компонентите и дополнителните трошоци за дата-центри.
„Ова е најдинамичниот период што сум го видел во нашата индустрија. Оптимист сум за сè што градиме за да им овозможиме на милијарди луѓе подобро поврзување и изразување“, навел Закерберг во дописот.
Тој признал и дека компанијата не била доволно транспарентна кон вработените и порача дека тоа мора да се промени во иднина.
Според интерните информации, вработените во САД кои добиле отказ ќе добијат отпремнина од четири месечни плати, како и дополнителна компензација според годините поминати во компанијата, заедно со поддршка за здравствено осигурување и имиграциски прашања.
