Премиерот Христијан Мицкоски изјави дека по повеќе од три децении конечно е затворена проектната и финансиската конструкција за источниот дел од железничкиот Коридор 8 кон Бугарија, оценувајќи дека проектот сега претставува функционална целина, а не, како што рече, „половина тунел во средина на ништо“.
Тој посочи дека во изминатите две години биле направени напори за усогласување со Бугарија, при што биле постигнати договори и преземени обврски за модернизација на железничката делница од бугарската граница до Софија, како и за заедничка изградба на прекуграничниот тунел.
„Пред две години требаше да потрошиме повеќе од половина милијарда евра, а да завршиме на половина тунел, без гаранција дека железницата ќе продолжи кон Софија. Денес имаме целина што ќе ги поврзе двете држави и ќе создаде додадена вредност за нивните економии“, рече Мицкоски.
Премиерот нагласи дека тунелот, како заеднички проект меѓу Македонија и Бугарија, се очекува целосно да биде финансиран со грант од Европската комисија, додека за останатиот дел од проектот ќе помогнат Европската инвестициска банка (ЕИБ) и Европската банка за обнова и развој (ЕБОР).
„Бев тинејџер кога првпат се зборуваше за источниот дел од Коридорот 8, а денес, како претседател на Владата, можам да кажам дека по повеќе од 30 години конечно го затворивме ова прашање како проект и финансиска конструкција“, истакна тој.
Мицкоски додаде дека Владата ќе продолжи со реализацијата на Коридорот 8, при што во рамки на Реформската агенда е предвидена модернизација и електрификација на железничката делница Скопје – Јегуновце – Тетово – Гостивар.
Во однос на делницата Гостивар – Кичево – Струга – границата со Албанија, премиерот рече дека ќе се постапува внимателно, земајќи ги предвид препораките на УНЕСКО за заштита на Охридскиот Регион.
Тој најави дека тендерската постапка за изградба на новата делница треба да заврши до крајот на годинава, а градежните работи да започнат уште во текот на оваа година.
