Мицкоски: Без промовирање на семејните вредности, македонската економија ќе биде прва на удар

Премиерот Христијан Мицкоски предупредува дека недостигот од работници и намалувањето на наталитетот може сериозно да се одразат врз македонската економија. Според него, државата треба повеќе да ги промовира семејните вредности и да ги поддржува многудетните семејства.

— реклама —

„Ако не се свртиме кон семејните вредности и кон многудетните семејства и ако тие вредности не ги промовираме, за жал македонската економија ќе биде прва која што ќе биде на удар“, изјави Мицкоски, коментирајќи ја најавата на вицепремиерот и министер за транспорт Александар Николоски дека до 2030 година на Македонија годишно ќе ѝ бидат потребни 50.000 странски работници за да го задржи сегашното ниво на бруто-домашниот производ.

— реклама —

Одговарајќи на новинарски прашања по промоцијата на проектот за набавка на 100 нови амбулантни возила, премиерот оцени дека демографските предизвици бараат подлабока анализа. Тој потсети дека и претходно зборувал за наталитетот и семејните вредности, но неговите ставови тогаш биле предмет на критики.

Мицкоски смета дека потребата од 50.000 странски работници годишно можеби е и потценета, посочувајќи дека во иднина може да бидат потребни уште повеќе работници за да се зачува економската активност.

— реклама —

Како пример ги наведе земјите од Западна Европа, каде што, според него, се издаваат стотици илјади, па и милиони работни дозволи за мигранти за да се одржи економското ниво и да се обезбеди благ раст на номиналниот БДП.

Премиерот порача дека ќе продолжи да ги поддржува политиките за промовирање на семејните вредности и поддршка на многудетните семејства, и покрај критиките. Според него, овие политики се важни за иднината на државата, отворањето нови работни места за домашните работници и зголемувањето на конкурентноста на македонската економија.