Премиерот Христијан Мицкоски, во обраќањето по повод Илинден, порача дека сегашната генерација има обврска да ја зачува и зајакне државата, нагласувајќи дека идеалите на Илинден и АСНОМ треба да останат темел за иднината на Македонија.
Тој истакна дека Илинден не е само историски датум, туку завет што ги поврзува Крушевската Република и АСНОМ како две клучни етапи во создавањето на македонската државност. Според него, слободата и државноста се изборени од македонскиот народ и затоа тие претставуваат трајни вредности што треба да се чуваат.
Мицкоски рече дека денешната битка не е само политичка или економска, туку и битка за довербата во институциите, за правдата и за достоинството на граѓаните. Тој нагласи дека Владата ќе продолжи да работи на подобри услови за живот, нови инвестиции, повисоки плати, подобро образование и здравство, со цел младите својата иднина да ја гледаат во Македонија.
Во говорот упати критики кон опозицијата, оценувајќи дека наместо идеи нуди песимизам и поделби, а порача дека нема да прифати, како што рече, „предавства на штета на државата и народот“.
На крајот од обраќањето, Мицкоски ги повика граѓаните на единство и истакна дека Македонија треба да се гради како држава во која владеат правдата, еднаквоста и надежта, додавајќи дека идеалите на Илинден и АСНОМ остануваат патоказ за идните генерации.
