Премиерот Христијан Мицкоски на денешната прес-конференција ги отфрли тврдењата на лидерот на СДСМ, Венко Филипче, дека земјата ја очекува тешка есен на енергетски план и ново поскапување на електричната енергија, оценувајќи дека станува збор за, како што рече, неосновани политички обвинувања.
Според Мицкоски, опозицијата со години пласира сценарија за економски колапс и други кризи, но тие, како што рече, не се оствариле.
„Веќе трета година од мандатот цената на електричната енергија за граѓаните не само што не е поскапена, туку се обидуваме да најдеме формула од јануари да поевтини“, изјави премиерот.
Тој потсети дека, според него, за време на владата на СДСМ и ДУИ цената на електричната енергија пораснала за една третина и додаде дека тоа се, како што рече, мерливи резултати кои можат да се споредуваат.
Мицкоски нагласи дека приоритет на Владата останува подобрување на животниот стандард на граѓаните и дека во таа насока ќе продолжи да ги креира своите политики.
Осврнувајќи се на критиките од опозицијата, тој оцени дека тие водат „некреативна и незрела политика“, додавајќи дека Владата ќе остане фокусирана на реализација на проектите и економските политики.
