Премиерот Христијан Мицкоски изјави дека интерконективниот далекувод Битола–Елбасан претставува клучен енергетски проект со кој Македонија конечно се поврзува со сите соседни електроенергетски системи, оценувајќи дека станува збор за чекор кон поголема стабилност и интеграција во европската енергетска мрежа.
„Не зборуваме само за еден инфраструктурен проект, туку за поврзување, стабилност и иднината на двете држави во рамките на европското енергетско семејство“, рече Мицкоски.
Според него, со изградбата на 400 киловолтниот далекувод, долг околу 100 километри, се затвора долгогодишната празнина во енергетската мрежа на Коридор 8.
„За првпат стануваме целосно поврзани со сите соседни електроенергетски системи. Тоа значи повеќе сигурност за граѓаните и стабилност за стопанството“, изјави премиерот.
Тој нагласи дека проектот бил соочен со долгогодишни застои, иако кредитот бил обезбеден уште во 2015 година, а договорот потпишан во 2020 година.
„Наместо градежни активности, годините беа потрошени во одложувања и преговарања. Беше набавена само дел од опремата, без суштински напредок на терен“, рече Мицкоски.
Владата, како што посочи, донела одлука за раскинување на договорот со претходниот изведувач, по анализа и во координација со меѓународни партнери.
„Ја заштитивме државата и инвестицијата. Повеќе од половина од набавената опрема останува и ќе се искористи“, изјави тој.
Потоа следел рестарт на проектот и избор на нов изведувач преку постапка според европски стандарди.
„Овој проект денес е спасен, рестартиран и поставен на здрави темели“, рече Мицкоски.
Тој оцени дека далекуводот има и пошироко значење, како сигнал за регионална соработка и доверба кај инвеститорите.
„Не зборуваме само за кабли и столбови, туку за енергија што ќе ја движи економијата и стабилност што ќе ги штити граѓаните“, изјави премиерот.
Според него, Македонија со овој проект се позиционира како сигурен партнер во европските енергетски текови.
„Доаѓа времето кога Македонија нема да биде на периферијата, туку во центарот на енергетските текови“, порача Мицкоски.
